mk Logo

കണ്ണൂർ: അതിർത്തിയിലെ ഇന്ത്യ-പാകിസ്ഥാൻ സംഘർഷത്തെ തുടർന്ന് എൽഡിഎഫ് സർക്കാരിന്റെ നാലാം വാർഷികാഘോഷങ്ങൾ മാറ്റിവെക്കുന്നതായി മുഖ്യമന്ത്രി പിണറായി വിജയൻ അറിയിച്ചു. മന്ത്രിസഭായോഗത്തിലാണ് ഇത് സംബന്ധിച്ച തീരുമാനം ഉണ്ടായത്. കണ്ണൂർ കലക്ടറേറ്റ് മൈതാനത്തിൽ നടന്ന എൽഡിഎഫ് ജില്ലാ റാലിയിൽ സംസാരിക്കുമ്പോഴാണ് മുഖ്യമന്ത്രി ഈ വിവരം അറിയിച്ചത്. "രാജ്യത്തിനെതിരായ പാകിസ്ഥാൻ നടത്തുന്ന ഒളിയുദ്ധം കണക്കിലെടുത്ത്, ഇപ്പോഴത്തെ സാഹചര്യത്തിൽ ആഘോഷം നടത്തി മുന്നോട്ട് പോകുന്നത് ഉചിതമല്ല" എന്ന അഭിപ്രായം ഉയർന്നതിന്റെ അടിസ്ഥാനത്തിലാണ് ഇതിലെ മാറ്റങ്ങൾ. ഇനി ബാക്കിയുള്ള ആറു ജില്ലകളിൽ നടക്കേണ്ട വാർഷികാഘോഷങ്ങൾ റദ്ദാക്കും. പിന്നീട് അനുകൂലമായ സാഹചര്യത്തിൽ ഇവ നടത്തുമെന്ന് മുഖ്യമന്ത്രി അറിയിച്ചു. അതേസമയം, ഇതിനോടകം ആരംഭിച്ച ജില്ലകളിൽ നടക്കുന്ന പ്രദർശന മേളകൾ തുടരും, കലാപരിപാടികൾ മാത്രമാകും ഒഴിവാക്കുക. "രാജ്യത്തിന്റെ അഖണ്ഡതക്കും സുരക്ഷയ്ക്കുമായി നാം ഇന്ത്യക്കാർ ഒറ്റക്കെട്ടായി നിൽക്കേണ്ട സമയമാണിത്. രാഷ്ട്രീയ വ്യത്യാസങ്ങൾ മറന്നും രാജ്യത്തെ സംരക്ഷിക്കാൻ ഐക്യമായി നിൽക്കണം," മുഖ്യമന്ത്രി പറഞ്ഞു. ഏപ്രിൽ 21ന് ആരംഭിച്ച വാർഷികാഘോഷങ്ങൾ മേയ് 30വരെ നീളേണ്ടതായിരുന്നു. ഇതുവരെ എട്ട് ജില്ലകളിലാണ് പരിപാടികൾ നടന്നത്. തിരുവനന്തപുരത്താണ് സമാപനച്ചടങ്ങ് നടക്കാനിരുന്നത്.